Қасиетті Ұлытау жері - Абылайхан үш жүздің басын қосып, бір ту астына біріктірген, бүкіл қазақтың бағына біткен киелі мекен. Топырағында Жошыхан мен Алашаханның, Домбауыл батырдың кесенелері орналасқан, сонарында Едіге мен Тоқтамыс батырлар жерленген. Бөктерін Ұлы Жібек жолы басып өткен. Осылайша, Сары-Арқаның төсінде орналасқан таулы мекен халқымыздың тарихи қойнауынан терең сыр шертеді.
Ұлытау – мен үшін туған жер, алтын бесігім. Адам өміріндегі әр жеңісінің астары туған жердің ұшқынымен көмкерілген. Жер шарының небір шалғай түкпірінде жүрсе де адам өзінің туған жерін ерекше қимастық-ырзашылық сезіммен еске алып, бейнесін жүрегінің түкпірінде қастерлеп сақтайды, ұрпағына жеткізіп, аманат етеді. Мен де немерелерімді кішкентай күнінен елге апарып, ата қонысымен таныстырып, елдің иісін сездіріп, «Ұлытауды ұмытпаңдар» - деген аталық өсиетімді жадына құйып өсіруге тырыстым. Биік рухымен жеткіншектерін әрдайым жеңіске жеткізіп, дем беретін қарт Ұлытауыма мәңгі тағзым етемін.
Төрегелді Шарманов
